شفته علي ماكس النهاردة. مكنتش أعرف أنه موجود أساساً. اسمه Purple Violets و من بطولة ممثلين صف تاني، بس بحبهم و هم اللي شدوني أتفرج عليه، إيدي برنز بحب صوته، و تهييسه، و طريقته، و وضعه في هوليوود كممثل و منتج منفذ و كاتب و مخرج. سيلما بلير برضة بحبها من أول ما عرفتها بدورها الرخم الصغير في Legally Blonde.
الفيلم عجبني من لحظاته الأولي، جروب من أربع أصدقاء كانوا مرتبطين ببعض، و بعدين تفرقوا، و بعدين اتقابلوا تاني. الكتابة واخده جزء حلو من الفيلم. عجبني مشهد بتاع إيدي برنز و هو بيقول لسيلما إن الأمريكيين دلوقتي مبيحبوش الأدب الجاد، و لكن بيروحوا لأدب المغامرات السريع المشوق، و قالها لو كنتي رايحة رحلة تاخدي كتاب لفوكنر، و لا حاجة سريعة مثيرة لجون جريشام؟
عجبني الفيلم فعلاً برغم بساطته، و برغم أن هو ما يحملش أكتر من السطور المباشرة في السيناريو، بس إيدي برنز تكفل بأنه يضحكني في مشاهد كتير، و من غير حتي ما يكون قاصد. عجبتني الأجزاء برضة اللي اتكلموا فيها عن الكتابة، و عجبني اسم الرواية الأخيرة اللي كانت علي اسم الفيلم.
فيلم حلو ضيعت بيه وقت حلو عشان مشتغلش في البحث.
أولاً مش عاجبني اللوك الجديد للمدونة ، التاني كان رايق وهادي وبيحسسك بالرقي والاتساع والراحة النفسية
ردحذفثانياً حاسة أنك أقرب في شخصيتك ليهم لأنك بترفض نفس النوع من الأدب وبتهرب لأدب المغامرة والدليل قالولوا :D
ثالثاً اسم الفيلم مش عارفة ليه ترجمته كده ؟ مع اني حاسة انه نوع من التصنيف للون البنفسجي ، خصوصا ان البربل والفايليت الـ 2 درجات للبنفسجي ، واحد محمر شوية والتاني مزرق ، بس مش قادرة أوصل لترجمة دقيقة عربية يعني
ويمكن لها سياق في الفيلم بيوضح انه معناه كتابة بنفسجية فعلاً ، انا مشفتوش على كل حال
مش عاجبك أي حاجة يعني ! :D
ردحذفيعني ايه الدليل قالولوا ؟ مش فاهمها الحتة دي.
ترجمة الفيلم ملهاش معني، أنا مترجمتوش..الكتابة البنفسجية ده عنوان جه ف بالي ملوش علاقة بالفيلم. حلو؟
و شكل المدونة القديم هرجعه تاني بعد شوية..كنت بجرب البنفسجي ده شوية. بحسبك بتحبيه! تصدقي زعلتيني.
الدليل قالولوا _ ويكبيديا الموسوعة الحرة
ردحذفهو افيه مصري شهير مقتبس من مسرحية "شاهد مشافش حاجة" من بطولة عادل امام و عمر الحريري
غالباً ما يقال الافيه في حالات معرفة الطرفين بالدليل الواضح والبين على الكلام وغالبا ما يكون مخفياً أو متفق عليه بين الاشخاص
مثال :
تقول صديقة لأحد اصدقاءها لم لا تقرأ رواية كذا ؟ فيرد : لا أحب هذا النوع من الأدب ، أجده مملاً
بعد فترة يضع الصديق تدوينة تثبت وجهة نظره وترد الصديقة : والدليل قالولوا
الكتابة البنفسجية عنوان حلو جداً وحالم ورومانسي ، اختلط عليا باسم الفيلم بس
دااااااااااااااااا مششششششششششششش بنفسسسسسسسسجي >_< !!! ده بترولي أو جنزاري فاتح ، ملوش أي علاقة بالنفسجي
للمزيد من المعلومات حول اللون البنفسجي يرجى زيارة الوصلة الآتية :
http://www.google.com.eg/images?q=purple+color&um=1&hl=en&biw=1280&bih=685&tbs=isch:1,ic:specific,isc:purple&source=lnt&sa=X&ei=TxV1TevOJsaEOqSm2L8G&ved=0CB0QpwU
شكراً لسعة صدر هيئة المحلفين