الثلاثاء، 6 أكتوبر 2009

انتوا فاكرينا ايه؟

هذه التدوينة مساهمة من مُدون مصري علي طريقة (المدون الضيف)، لكنه رفض الإشارة إليه مما أثار دهشتي في البداية، لكنني فهمت بعد ان قرأت..هذه هي التدوينة التي نريد ان نكتبها جميعاً، لكننا نمتنع عن وضع اسمنا عليها..

"
مش هطول عليكو كتير..ومش هتفلسف..عايز اتكلم بس في موضوع الحب، الحب بين الراجل والست وقد الاتنين مش فاهمين بعض..وقد ايه الشعب ده جاهل وغبي، وبيعمل اللي رسخته في ذهنه الأفلام القديمة، وزي ما كل الناس بتعمل احنا بنعمل..
اولاً انا ولد..ودي مصيبة !..لأن مفيش مساواة، انا مطلوب مني كل حاجة وهي مش مطلوب منها اي حاجة !..الولد ميقدرش يحب لما يبقي مامعهوش فلوس..لكن هي تقدر تحب براحتها..ومن غير اي ضغوط.
انا لو حبيت يبقي لازم احفر في الارض عشانها..وكمان ممكن متبقاش ليا في الاخر لو اهلها معجبهمش الحال!..وفي الاخر تروح لواحد تاني..جاهز..غني..وأكبر منها بسبع تمان سنين !
وهي كمان مش فارق معاها..هل هي بتحبني فعلاً؟..انتوا -كبنات- بتفهموا معني الحب اصلا؟..ولا اهه اي واحد وخلاص المهم يقعدك في بيت ويركبك عربية، ويعملك حساب في البنك؟..
ولا هيفرق معاكي حاجة طبعاً..انتوا متعودين علي كده اصلاً..تلعبوا بكل اللي حواليكوا وفي الاخر تختاروا احسن واحد موجود..ولا بتحسوا احنا بيحري لنا ايه لما نشوفكوا مع حد تاني..لما الولد يشوف البنت اللي كان نفسه فيها مع حد تاني..عمركوا ما هتحسوا بينا وبالسكاكين اللي بتطقعنا من جوه ساعتها..عشان انتوا فاكرنا مبنحسش..معندناش قلب..لأننا بالنسبة لكم آله بتجيب فلوس وبس !
حتي الامثال الشعبية اللي انتوا اخترعتوها : الراجل مش بلبسه او بحلاوته، الراجل مايعيبوش الا جيبه..يعني انتوا شايفين الراجل عبارة عن جيب بس..
ولما حلمتي يا حبيبتي حلمتي بالعربية والشقة والفلوس..ماحلمتيش بالحنان اللي في قلبي ليكي، واللي شايله علشانك..واضح انه مكنش فارق معاكي..
هو انتي فاكرة ان انا كمان مش بحلم..هل انا يعني فقري وبحب الفقر؟..ما انا كمان بحلم وبخطط..وهيبقي عندي كل ده بس في خلال فترة من الشغل والتعب والعمل..لكن انتي معندكيش استعداد تصبري او تكافحي معايا..انتي عايزاهم دلوقتي !
طب ما تنزلي تشتغلي وتوريني نفسك في بداية حياتك..ساعتها هتعرفي ان احلامك دي واقفه علي الهوا وملهاش اساس..عرفتي بقي ان احنا مش متساويين..والله ما تستاهليني !
وانا لما اكبر وابقي غني ومعايا فلوس..مش هروح اتجوز واحدة اصغر مني بعشر سنين عشان اربيها علي مزاجي..وعشان مكسرش قلب واحد قدها بيحبها بس لسه في بداية حياته..مش عشان انا فارس وانسان رائع والكلام الفاضي ده..لا..
ده عشان انا مش هعرف اتجوز ولا ابص في خلقه واحدة تانية..مش هعرف ابقي مع واحدة تانية ونبقي بننام في سرير واحد..عشان انا قلبي عرف معني الحب بجد..وانتي معرفتيهوش.
"

انتهت التدوينة..رفض المُدون الضيف -وهو صديقي بالمناسبة- الإشارة إلي اسمه كما قلت، كما فضل نشرها بعيداً عن موقعه، وهو شئ احترمه..ارجو عدم مراسلتي او الضغط علي لمعرفة كاتب الرسالة لعدم الإحراج..وبالنسبة لرأيي فيما جاء فليس لدي ما اقوله فأنا منشغل بالوقوف إلي جواره، فهو كما قلت صديقي.

هناك 14 تعليقًا:

  1. كلام حقيقي وواقعي وانا مشرف علي تجربة مماثلة قد تحدث وقد لا تحدث لنا الله.
    والله يصبرك عزيزي المدون المجهول،
    وشكرا احمد علي نشر هذه التدوينة الجميلة.

    ردحذف
  2. كلامك كده ناقص كتير كمان لأنهم مش عاوزين فلوس وبس لا كل حاجة امان وحنان ومطلبات زوجية + الى انت قلته كل ده بلا مقابل ويزعلوا اوى لما تاخد قرار عليهم ويتنفذ ويقوللك بتتحكم فينا ..يعنى يبقى من مالك ومتتحكمش ..ده انت مش نقصك الا كنت تخلفها وتدفع حق الى اتصرف عليها وهى صغيرة وكده تبقى ملكك رسمى ... لو طالبين مننا اننا نتخذ الرسول عليه الصلاة والسلام وأصحابه امثال لينا ونبقى ازواج صالحين ومثالين ..ياريت هما كمان يتخزوا أمهات المؤمنين مثل ليهم ..

    ردحذف
  3. انا مقدره اوي موقف البنت دي عشان انا كنت في يوم من الايام مكنها بالظبط و كنت في نفس الحيره تماما بس اللي حصل اني اختارت اني اصبر و استحمل لحد المعاد اللي احنا متفقين عليه و انا فعلا صبرت و دا كان اختياري علي الرغم ان كنت بتعب في نص المشوار بس كنت برجع اقول انا اخترت ده و لي اسبابي بس بقي للاااااااااااااااااسف اللي حصل اني الوقت اللي احنا اتفقنا عليه دا محصلش اي حاجه و مش عشان الظروف وحشه لا دا عشان هو شايف اولويات تانيه لما بقي اشتغل يعني العربيه اهم من الشقه عشان مينفعش يروح الشغل موصلات و اللبس لازم يبقي ماركات عالميه عشان برستيجه و انا بقي و الجواز في المرتبه التانيه و اكتر حاجه تعبتني ان هو كان مصمم برضه ان احنا نخرج و نتقابل و نبقي مع بعض عشان انا اللي بيحبها و عايزها بس منغير ميتعب نفسه و يجي عليها خالص و سعتها انا اخترت الاختيار التاني و قررت ان دا مينفعش و قطعنا علاقتنا

    ردحذف
  4. انت كلامك حلو اوي بس مش كل البنات بتتخلي عن الولاد علي حسب التربيه لو هي عاشت محتاجه في بيت اهلها للفلوس يبقي اكيد هيبقي هدفها الاول والاخير الفلوس بس هي لو متربيه تحترم وتحس بمشاعر اللي حوليها يبقي اكيد هتعرف تقدر اللي بتحبه

    ردحذف
  5. بص انا معاك اوى فى الكلام الى انت قولته ده و بجد مقدرة احساسك و مشاعرك بس معلش العيب فى الاختيار اكيد انت اخترت غلط كان لازم تختار واحدة تحس بظروفك و ترضى بيك لانى انا اهو بحب واحد و راضية بيه و عاوزاه و مستحمله ظروفه عشان بس بحبه و مش شايفه غيره قدامى و ماتخيلش نفسى ابدا ابدا مع واحد تانى غيره مش لانى ملاك و لا بشكر ف نفسى انا اكيد طبعا ساعات بتضايق و ببقى نفسى الموضوع يكمل بقى و بعدين ارجع تانى و اقول لأ ده اختيارى و هاقف جنبه ان شاء الله للنهاية وانا عندى ثقة ان ربنا هيساهلنا و يساعدنالانى فعلا البنت لازم تدور على راجل بمعنى الكلمة لان انا اسفة بقوا قليلين دلوقتى اوى فانا محتاجه راجل زيه اعتمد عليه فى حياتى يكون سند ليا مش محتاجه فلوسه

    ردحذف
  6. انا بحب واحد كان بيحب وحدة عملت فيه الي البنت عملتو فيك بس انا داويت جروحو و احنة دلوق كويسن كدا انا نسيتو البنت دي و مبقاش يفكر غير فية و انا وعدتو اني هستناه لحد اخر يوم من عمري مع انو اهلي معترضيييييييييييييييييييييين جدا بس انا وعدتو و انا لسة عند كلمتي و حكون علشان هو اول و اخر حب بحياتي .. و حابة اقلك انو صوابعك مش زيي بعضها

    ردحذف
  7. كلام جميل جدآآآ ويمكن بنات كتير بتعمل هيك بس ع فكره هو عمم ع الكل
    انا بالنسبة اللي بحب واحد وهو بيحبني والنا 4 سنين مع بعض ولسه باقي مشوار طويل قدامنا
    بس بتعرفو انتو ما بتحسو بالضغط اللي من جهة الاهل
    الضغط هاد اللي ممكن في بعض الاحيان يخلي البنت تستسلم مش البيت والسيارة وكل الكلام هاد
    كل بنت بدور ع الحنان والحب بس طبعا لو بتحب بجد
    لانو برضو مش كل البنات صادقين وبيحبو ممكن زي محكيت حضرتك
    بس طبعا هاد مش معناه انو الكل هيك

    ردحذف
  8. kalam waky f eh bzabt
    ah lazem al ragel howa aly yshta3'al w yt3ab .. wala al regal kawamon 3an al nesa2 ezay....
    w howa law al bent fakaret tshta3'al ay 7aga sahl 3aleha law f al tegara masalan... al nas aly 7awaleha bistad3afoha 3ashan heya bnt

    ردحذف
  9. أنا بحييه جدا :)
    و الله كلامه كله صح .. فيه بنات بتبقي واخده الموضوع لعبه .. و بيبقي الموضوع عندها مجرد مراهقه مع تخطيط لاصطياد عريس بيحبها أهو بالمره يعني

    ردحذف
  10. انا فى رأيى ان البنات مش كلهم ذى ما انتوا متصورين ومش كلهم وحشين وبيسيبوا الولد عشان ممعهوش فلوس ممكن تبقى بتساعدة وبتكافح معاة عشان يوصلوا للى هما عايزينة مع بعض بس مش معنى كدة ان مفيش بنات وحشين لا فية بنات بتعمل اكتر من كدة كمان ومبيبقاش فارق معاهم بس زى ما قولنا اللى لينا نقول اللى علينا كمان ما فية ولاد كمان بتعمل كدة واكتر من كدة وفية ولد لما بيلاقى البنت مستنياة وبتكافح معاة بيطرمخ الدماغ ويقضيها يشتغل يوم وعشرة لا ما هى كدة او كدة مستنيانى ومش معنى كدة انة مبيحبهاش مش شرط ممكن يكون بيحبها بس احساسة بالمسئولية قليل فهنا الموضوع كلة بيتلخص فى كلمة واحدة هو الاحساس بالمسئولية اذا كان الولد او البنت اى حد فيهم هيحس بالمسئولية هيحارب عشان يوصل للى هوا عايزة
    وانا اسف جدا طولت عليكم بس هوا دة رايى

    ردحذف
  11. bgd kalamk 2sar fya 2wyyy w kol ely 2olto mazboot el moshkela en el de tab3et el 2nsan eno 3yez kol 7aga
    may3rafesh en lazem fe 7aga betkon 3ala 7esab 7aga
    w el 2ensan lazem yeqrar da
    bas ana fe r2yeh el 7ob 2ham 7aga l2en da ely by7'aly 3agalet el 7ayah tedor w telef w t2dar tewagh el mashakel ely hat2blak feh 7ayatak
    bgd el mada mesh kol 7aga

    ردحذف
  12. كلامك تعب اعصابى اوى
    بس يمكن هى عملت كده لانها كنت خايفة لتكون مش صادق فى مشاعرك ... كتير بتحصل

    ولازم تعيش حياتك وتبدأ من جديد وانساها للأبد عشان الحياة مش هتقف عندها

    ردحذف
  13. عارف بجد انت حسستنى انى بنت ولا حاجة لانى فعلا بفكر بنفس الطريقة ده انا بحب واحد ولسه المشوار قدامه طويييييييل ومفهماه انى هستناه او بقنع نفسى انى هستناه بس بينى وبين نفسى عارفة انه اول حد مناسب وجاهز هييجى انا هتخلى عنه وعن احلامه الى بيحلمها لينا والى مش قادرة اتخيلها ولا اجاريه فيها... عندك حق انا بفكر فحاجات كتير مهمة فاكرة انها هتسعدنى ونسيته هو وحبه ليا..عارف هو يستاهل وحدة احسن منى زى ما انت تستاهل واحدة احسن من حبيبتك بكتير.. وكلمة منى كبنت مش كلنا بنفكر كده رغم انى واحدة منهم بس اصبر الى زيك يستاهل حد احسن منى ومنها

    ردحذف
  14. أنا قريت الكلام دا و أحب أعرفك على تجربتي

    أنا عندي 29 سنة و حبيت واحد أصغر مني بسبع سنين تقريباً، أحب أقوللك إني غنية و أهلي أغنيا و مش مخليني محتاجة حاجة، و كان هو بيعاني من ظروف مادية صعبة و أهله كانوا بيطردوه من البيت كل شوية، و لأنه مكانش معاه فلوس فكنت بأصرف عليه و أسلفه و بسيب له فلوس عشان يدفع التاكسي و مكانش عنده عربية حتى لما كنا بنخرج مع صحابنا كنت بأديله الفلوس من تحت الترابيزة أو في السر عشان يحاسب هو قدام الناس ليا و ليه كأنه هو اللي دفع!!

    أو ساعات هو بيمشي قبليا لأنه طالب و ميقدرش يتأخر و أنا أحاسب له و أقول بابتسامة محرجة قدام صحابنا إنه سابلي فلوس عشان أحاسب له لما الشيك ييجي و الله كنت بعمل كدا من قلبي، و كنت بجيب له هدايا و أشوف إيه اللي ناقصه كروت شحن بخمسين و مية من وقت للتاني و كروت بعشرة و عشرين جنيه علطول، و كنت أنا اللي بتصل بيه علطول لأنه كارت و خايف على رصيده و أنا فاتورة و بعد كدا عرفت إنه كان بيكلم واحدة تانية بكروت الشحن اللي أنا باشتريهاله و يخلصها عليها، و عامل إشاعات إنه بينام معايا و مدمر لي سمعتي، و لما اشتغل شغلانة كويسة أوي بمرتب كبير و بالدولار سابني في أول يوم قبض فيه أول مرتب وراح للواحدة التانية دي، و كتب بعدها قصيدة عصماء على نوت على فيسبوك عن إن علاقته بيا انتهت بسبب انتهاء المنفعة الحديّة.

    ردحذف