الاثنين، 4 أكتوبر، 2010

مصر اللي الفلاحين فيها طلعوا بيفهموا

مصر اللي كلمة فلاح فيها شتيمة..الفلاحين فيها طلعوا بيفهموا أكتر من القاهراوية..
حقائق : 
1. الفلاحين بيربوا عيالهم علي انهم رجالة من سن 10 سنين..وبيجوزوهم بدري وبيعملولهم قيمة. القاهراوية بيأخروا نضج المراهقين لحد الجامعة. الفلاح حياته بتبدأ فعلياً بعد 15 سنة. القاهري حياته بتبدأ فعلياً بعد 25 سنة بعد ما يخلص كل مراحل التعليم اللي خلقها ربنا وجيش والذي منه. 
2. الفلاح مش لازم يكمل تعليمه الجامعي..وبيشتغل بحرفة أو بيزنس بدري..القاهري لازم يدخل الجامعة من غير ما يعرف ليه، وهيستفيد بإيه.
3. الفلاحين عندهم قدرة أكبر علي التعامل مع الأزمات والمصايب، وعندهم إيمان وصبر وشدة كبيرة. القاهراوية خرعين كل واحد بسياسة (هذا يحدث للأخرين فقط).
4. الفلاحين مش مؤمنين بالوظيفة ذات الدخل الثابت..القاهراوية أفنوا عمرهم علي المكاتب.
5. الفلاحين بني ادمين حقيقين..وقتهم ملكهم..حياتهم بسيطة..عينيهم مليانة. القاهراوية بني ادمين مزيفين..وقتهم ملك رؤسائهم في الشغل..حياتهم معقدة وكلها تمثيليات..وعينيهم مبتشبعش شقق فاخرة وعربيات حديثة. 
6. الفلاحين كل واحد زي التاني..القاهراوية الغني يركب الفقير. 
7. الفلاح مناضل وحيد من يومه، يخرج في مظاهرات ويحتج بكل عنف ع اللي ميعجبوش..القاهري حابس نفسه في بيته، وحابس لسانه في بقه عشان عنده عيال.
8. الفلاحة تاخد الفلاح عشان رجولته..القاهرية تاخد القاهري عشان فلوسه. 
9. الفلاح دينه حبه لربنا..القاهراوية دينهم الحجاب والآذان الموحد والقبض علي اتنين بيحبوا بعض في الشارع/العربية بالرغم انهم مبيضروش حد.
والحقيقة العاشرة في المقارنة بين الفلاح والقاهري : 
10. الفلاح شخص نظيف مهندم..القاهري ما سمعش عن اختراع اسمه مزيل العرق.
يا رب ليه طلعتني قاهري حاسس ان القاهرة كلها كاتمة علي نفسي، وكأن مش كفاية ريحة عرقها في المواصلات.

هناك 4 تعليقات:

  1. اول مرة اختلف معاك اختلاف تام كامل مكمل،الفلاح مفرقش حاجة عن القاهري.
    علي العكس في بلاي محدش يعرفها غير اللي عاشر الفلاحين، وللاسف ماينفعش تتذكر هنا.

    ردحذف
  2. ده ما ينفيش ان الحقايق اللي قلتها صحيحة..واستنتج منها اللي انتا عايزة بقي

    ردحذف
  3. أنا بتفق جداً مع أحمد حلمي
    يمكن فيه كام نقطة هنا عندك صح زي التانية والتالتة مثلا ، لكن مين قال ان عدم الاهتمام بالتعليم الجامعي دي حاجة كويسة ؟ المشكلة كلها في تعليمنا كـ"مصريين" أننا مش بندخل نفسنا في الموضوع ، كأنه يخص أهالينا وبس مش مهم احنا عايزين ايه ، ده غير طبعاً النظام نفسه وأن الكليات بمجاميع الثانوية العامة
    زيه زي الجواز ، اللي بيخلي اهله يدوروا له على عروسة بنت حلال وهو ميعرفش اذا كانت متوافقة معاه ولا لأ ، بس هي مطابقة للشروط اللي اهله شايفينها صح
    بيخلفوا بنفسسسس النظام ، بالقصور الذاتي لأنهم لازم يخلفوا واللي حيتمعظم اوي حيقولك لأن الجواز رسالة وانا بخلف عيال علشان اربيهم صح واعمر بيهم الأرض
    كلام محفوظ وستيرو تايب وكله علشان اللي حوالينا

    الفلاحين يا عزيزي أكتر اهل الارض سلبية ، جرب تتناقش مع حد فيهم وتقوله انت عاجبك اللي بيحصل في البلد وحقوقك وبتاع ، حتلاقيه قانع تماما وبيدافع عن الحكومة اللي بتدوس عليه بالجزمة دفاع مستميت رغم انك بتكشف له حقايق وبلاوي بس هو اللي في دماغه مش حيتغير

    ردحذف
  4. الفلاح ميعرفش حاجة عن دينه اصلا ، يمكن يكون مش عندهم مشكلة اختلاف الاديان زي القاهريين بس على العكس جرب تشوف واحد مسلم منهم بيعمل ايه ، ولا بيصلي وبيصوم بـ"القصور الذاتي " برضو ولا يعرف ايه اللي صح وايه اللي غلط ولو فيه حاجة في عاداته ضد الدين تماما بيعملها وهو مقتنع انها صح لأنه جاست اتعود على كده يبقى هو ده الصح في نظره
    زي الكفار لما كانوا بيقولوا للرسل أنترك ما يعبد آباؤنا ؟!

    وبعدين مين قال ان تربية طفل من وهو عنده 10 سنين على انه راجل دي حاجة كويسة ؟
    مش بشكر برضو في الوجه الآخر من المقارنة بتاع القاهريين ، بس المفروض أن البني آدم علشان يطلع متزن نفسياً وعقلياً يعيش كل مراحل حياته في وقتها صح ، 10 سنين ده لسة في مرحلة الطفولة

    عايزة أقولك أن الفلاحين أكتر ناس بتدور على الميري ، او الوظيفة الثابتة ، الحكومة ، والدليل معظم اللي بيتعينوا في الجامعات من الطائفة دي

    ده مش احساس بالتميز عنهم لأني عايشة في القاهرة ، واصولي بالمناسبة من الغربية ، بس أنا عاشرت الناس دي 4 سنين واكتر وشفت وعرفت كل حاجة عنهم

    مثال آخير على كلامي ، شوف تصرفاتهم في القاهرة ، سواء هما او الصعايدة ، بالذات في المواصلات ، بيتعاملوا على انهم راحوا باريس مش القاهرة ، وكأن كل بنات القاهرة بايظيين ومش حيضايقهم أن البيه يفضل يفرض نفسه عليهم

    ردحذف